Alla Itolae Nusa 26
Me negara mere susa manane suike lupe akmena kena Abrahame eri rue sare. Eleki Isake ikeu loko Abimeleke kamale Filistine me Gerare.
Eleki TUHANE IaselukeNi lokoi kai Ibeteke be, “Akeu lopai Mesire yake, arue kena tapele rebe namake au tilukele ete ale.
Arue kena tapele meije lupe tamata maka luake beluke. Au rakamu kai Au riluke misete etemu, le tatike pine Au riluke pusue tapele meije ete ale kai amu anubuaru lulu Au la ete amamu Abrahame.
Namake Au ono amu anubuaru esi boka lupe kmale ndete lanite. Au riluke pusue tapele meije ete amu anubuaru. Kai bei amu anubuaru pusue tamata makete mei nusa meije esi supu misete,
le Abrahame ilene loko Auku lepataru kai iono lulu Auku pletaru kai Auku hukumaru.”
Hoko Isake irue me Gerare.
Eleki kena tamataa ete mere esi tneuke eni bina, Isake ibeteke be, “Ile betaku.” Irilai kena ibeteke be eni bina le tinake esi bunui leke esi rana eni bina le eni bina Ribka inteki kuate.
Kena Isake irue ete mere takwali peneka, rebai sae me Abimeleke, kamale Filistine mere iselu bei eni jendelare lope, iselu Isake kai eni bina Ripka luasi ata lomai.
Eleki ikoti Isake kai ibeteke lokoi be, “Tinai, bina mere amu bina le mula pine abeteke be, betamue?”
Eleki Isake iralake be, “Au noake be sepo au beteke be auku bina, ya pine au supu bunu.”
Abimeleke ibeteke be, “Aono sala ete ami. Le ono ele mere namake sae bei auku nusa toini meije intulu kai amu binare yele. Sepo ele mere hoko akele le amiki salare.”
Eleki Abimeleke iriluke pleta ete pusue eni rayataru be, “Sire pina toneke Isake pise eni bina hoko ini hukumane supu bunu.”
Eleki Isake iandinu ete mere hoko kena musune mere isupu hasile boka titinai rebai utune le TUHANE Iriluke misete etei.
Kai Isake isupu tanei boka titinai, lomei eni taneiaru tapa rame.
Isake eni domba, sape kai eni tamata makerika boka hoko tamata Filistine esi murukeni.
Hoko prigia rebe Abrahame eni makerikaru esi kalilu kena eri rue sare, esi penuelu kena tapele.
Eleki Abimeleke ibeteke loko Isake be, “Akeu bei ami noma le akbasa lesi bei ami peneka.”
Hoko Isake ikeu bei mere lope Gerare esi kweune eleki iono tenda leke irue ete mere.
Eleki Isake ikali suike prigi rebe kalie kena amai Abrahame eri rue sare rebe tamata Filistine esi penue tapele kenare kena Abrahame imata pende. Kai ikotie prigia meru lulu amai iono esi nane.
Eleki kena Isake eni tamata makerikaru esi kali prigi me kweune mere, esi tetue kwele boboke elake.
Eleki tamata maka raka binatana bei Gerare esi rare kai Isake eni tamata maka raka binatanaru. Esi ombe, “Kwele meije amikie.” Eleki Isake iono prigi mere esi nane Eseke, esi natire rare kai lomai, le esi rare kaini ete mere.
Eleki Isake eni tamata makerikaru esi kali prigi makete, po esi nasuke lomai le prigi mere leneka, hoko Isake iono prigi mere esi nane Sitna, esi natire musu kai lomai.
Eleki esi heti bei mere, esi kali prigi makete leneka. Po esi nasuke lomai le prigi mere moneka, hoko Isake iono esi nane Rehobote, esi natire otoi malenete elake, kai ibeteke be, “Meije TUHANE Iriluke otoi malenete elake ete ite peneka, hoko namake ite nebu boka ete meije.”
Eleki bei mere esi keu lopai Berseba.
Eleki kena kpetu mere TUHANE Iaseluke lokoi kai Ibeteke be, “Au meije amamu Abrahame eni Alla. Rilamu yake le Au sakesa kai ale, Au riluke misete ete ale kai Au ono amu anubuaru esi boka le Au taluke ete Abrahame, Auku tamata makerike peneka.”
Isake ieleke otoi kena pala taneia rebe rilukele ete Alla ete mere kai itatu loko TUHANE ete mere. Eleki esi eleke tenda ete mere kai eni tamata makerikaru esi kali prigi makete ete mere.
Kena rebai sae Abimeleke ibei Gerare sakesa kai Ahusate, eni tamata maka ahnaure, kai Pikole, eni solaluaru esi elake, esi luake loko Isake.
Eleki Isake ibeteke lokosi be, “Akmenare lalemi tiake au kai imi sui au bei imi tapele, po mula pine meije imi luake loko aure?”
Esi ralakeni be, “Meije ami ruama selu peneka be TUHANE Irakamu, hoko ami beteke be mise lesi ite taluke misete kai lomai kai la be
namake aono tiae ete ami yake saka ami ono tiae ete ale mo, ami sebeie akeu kena misete. Ami suka ite taluke misete kai lomai le ami rekwa peneka be TUHANE Iriluke misete ete ale.”
Eleki Isake iaknekae manane etesi eleki esi kane kai kinu.
Eleki ele bobanu beleti esi la ete lomai eleki Isake isebeie esi keu kai esi keu bei lomaije kena misete.
Eleki kena petu mere eni tamata makerika rebe esi kali prigire, esi luake beteke etei be, “Ami tetue kwele peneka.”
Eleki iono prigi mere esi nane Seba, natire la. Hoko roma meije kota Mere eresi nane Berseba re neka.
Eleki kena Esau eni musuna butu ata irana Beri, tamata Hete eni nanae Yudite, kai Elona, tamata Hete eni nanae Basmate, kena eni bina.
Bina lua meru esi ono Isake kai Ripka lua laleisu susa titinai.